Ekteb blughtek elli taħki biha. Wassel klemek kima hua. Lyum je el waqt bech lughtena neketbuha kima naħkiewha. Aεref akther.
Et Tunsi lughetna elli naħku biha mεa bεathna; feddar w felkhedma; ki nabdew farħanin, w ki yemkenna laεsab. Biha nqulu klem behi, w bel merzi menha nfarghu qlubna.
Ama khsara. Klemna fissaε mayhezzu erriħ w mayoqεed mennu chay. Klemna klem w barra. Je el waqt elli et Tunsi, klemna, yalqa blastu εal wraq, w fel internet; nektbu bih, kifma netkalmu bih.
Kima ghirna elli lught'hom mεahom win maykunu, je el waqt elli lughtena twalli bqdarha w bkarha. El Fransawya wala el Englizya mahich khir men lughet ejdedna.
Hedha ħaqna w lazemna ndefεu εlih!
Ħatta ħad maεandu el ħaq yqollek kifech tetkallem wala tekteb. Hedhi lughtek w εandek fiha alf ħaq bech tetkallamha kima tħeb w techt'hi.
Lahne εandna qaεda waħda: ellugha melk elli yetkallamha. Aħna khedmetna hya kifech el lugha el maktuba twalli toqrob akther mayomken lil lugha eli taħkiha laεbed, w much el εaks. Enti el mεallem.
Chnawa maεneha hedha? Elli dima enti essħiħ w idha fama haja fel ktiba mahich kif klemek, el ghalta mel ktiba. Muhemtna al kbira hya enna nħawlu nwaħdu kifech nektbu bech nabdew el kolna metfehmin.
Baaarcha ħajet. Kitebda lughtna fiha qwaεed wadhħin w en nes el kol taεrafhom w taεref win talqahom, ennajmu naεmlu barcha ħajet elli qbal makonnech neħlmu bihom.
Mathalan, twalli εandna el emkanya nasnεu lojisialet elli yaqraw lektiba, wala, belεaks, yektbu klemna, w εlech le yefehmuh w yεamlu chnawa notelbu menhom.
Ħaja okhra, bet Tunsi, el wraq elli naεmruhom wel jwabeet elli yuslulna ywalliew as'hel fel qraya, fel fahm w fel taεmir mteεhom. Chufu hedha waħdu qaddech bech yrabbaħna waqt w taskir ras.